Eun veladzo ni é vequèi mersì a la volontó é a la nesesetó d’eun sertèn nombro de-z-omo é de femèle. Heutte doe rèizòn l’an déù ihé bièn eumportante pe batì eun veladzo i mèitèn de doe paé de rotse que lèison pouca é ren de plahe pe campagne. Lo veladzo de Moulîe l’a an guizen-a de mèizòn que, ara, vignon moque dzouzuye pe la vacanse é pe aprofité de la tranquilitó di poste. Canque i comensemèn di 1900, Moulîe, can mimo, l’ie eun veladzo atò sa via sosiale é économique. Tchertché de confronté la via d’eun cou avouì hèla de ara l’è caze eumpousiblo é adòn, pe posèi comprende la via di dirì sièclle d’eun pequioù veladzo di Gran-Péadì, no fo beté eunsemblo le memouiye di vioù, leur conte é coutsouza que tsaqueun de leur l’a vecù. ","           Le tsan di trèifole é di blo l’ian euncò pi su pe po pourté ià de plahe i pro é, pe dzoure mioù hi pouca lardzo, fézàn de meure pe pourté eun plan lo térèn é aì de banque. Eun aitchèn heutte mèizòn eun comprèn mioù come l’ie la via den la pequiouda réalitó de montagne: dedèn lo mimo locale, i plan térèn, vequesàn le bihe é le dzi, avouì le bague nesesée pe la via de queu le dzore. Pouca mètre caró l’ian sufizàn pe la coutse, la tobla, lo fornè, la credense pe le dzi é la rètse pe le bihe. L’ie to hé, perquè to vèriòe a l’entore di pro é di tsan. É li n’ayè bièn pouca…","           Aprì, lo ten de la guèra, lo veladzo l’è ristó beurló é depoillà de queu se bièn. Eun pensèn i ten pasó que rescoe d’ihé oublià, couque dzouin-o di veladzo l’a voulù batì an mèizòn « pi dzenta », fran i fon de la valoda; an batise eun bèrio, selòn le réille é a la modda d’eun coù.
Teteun, aprì pouca ten, heutte dzi, a coza di « boum économique », se son traméye den la veulla é lo veladzo l’è ihó complétamente abandoun-ó, foua d’an venten-a de dzore a l’an, eun ocazòn de l’en-arpa di vatse. Heutta situachòn l’a deó caze trent’an, canque can eun vioù abitàn di veladzo l’a pensó que l’ie lo moumàn de recomensé. Paé, a partì di 1977, l’an arendjà la premìe mèizòn, hèla «pi dzenta» é aprì, den pouca-z-àn, lo veladzo de Moulîe l’è tournó eun via, belle se l’è eungn’outra vìa. Queutte no n’en vecù eun grou tsandzemèn: no sen pasó de la via den lo boou, a la lemie élétrique, i tsemeun «goudron-ó», a Enternet é a la télévijòn satélitère. Tsique jénérachòn l’a betó coutsouza de personèle pe mantin-ì hi poste, todzore i mèitèn de doe paé de rotse, todzore i mèitèn de doe laèntse, todzore Moulîe.